काठमाडौं- नागरिक उन्मुक्ति पार्टीका संरक्षक रेशम चौधरीले हिजो कपाल फुलेका बुढाहरुले देश बिगारेको अनुभव सुनाउँदै आज कपाल काला भएका युवाले पनि देश बनाउने छनक नरहेको टिप्पणी गरेका छन् । नेपाली कांग्रेसको १५ औँ महाधिवेशनलाई सम्बोधन गर्दै संरक्षक चौधरीले कांग्रेस सभापति गगन थापातर्फ संकेत गर्दै ६०-७० वटा कपाल फुलेका र १०-१५ वटा जुँगादाह्री फुलेको युवाले देशको नेतृत्व गर्नुपर्ने माग राखेका छन् ।

‘संविधानमा सबै अधिकार लेखिए तर दिएनन् गगनजी हामीले कहिले अधिकार पाउने? नेपालको संविधानमा ६.४% लेखिएको थारु सत्ताको कुर्सीमा कहिले पुग्ने ?’ रेशमले भने, ‘गगनजी तपाईं विश्वास मान्नुहोस् नमान्नुहोस्, हिजो सबै दाह्रीजुँगा फुलेका नेताहरुले देश बिगारे, आज कपाल पूरै काला भएका नेताहरूले पनि देश बनाउने छनक देखाएका छैनन् । अब गगनजी तपाईँ जस्तै १०-१५ वटा दाह्री फुलेको ५०-६० वटा कपाल फुलेको नेताले देश बनाउँछ भन्ने विश्वास छ ।’

जनआन्दोलनमा सँगै सहयात्रा गरेको विषयमा समेत रेशमले गगनको तारिफ गरेका छन् । उनले थारु समुदायको छोरो भएकै कारण आफू राजनीतिमा पछि परेको समेत टिप्पणी गरे । विभिन्न अभियोग लगाएर आफूलाई जेल थुनिएको विषयमा समेत रेशमको असन्तुष्टि थियो ।