काठमाडौं– चर्चित हास्य कलाकार शिवशंकर रिजाल ‘जोगिन्दर पानवाला’ अब मनोरञ्जनको पर्दाबाट राजनीतितर्फ अघि बढ्ने तयारीमा छन् । उनले नेपाली कांग्रेसको १५औँ महाधिवेशनमा केन्द्रीय सदस्य पदमा उम्मेदवारी दिने घोषणा गरेका हुन् ।

सर्लाही क्षेत्र नम्बर ४ बाट तेस्रो पटक महाधिवेशन प्रतिनिधि बनेका रिजालले यसपटक पहिलोपटक केन्द्रीय सदस्यका लागि प्रतिस्पर्धा गर्न लागेका हुन् । 

कांग्रेसको शुभेच्छुक संस्था सांस्कृतिक महासंघका महामन्त्रीसमेत रहेका रिजालले कला क्षेत्रका समस्या र मुद्दालाई राजनीतिक तहमा प्रभावकारी रूपमा उठाउन उम्मेदवारी दिन लागेको बताएका छन् ।

नेपाल विद्यार्थी संघ हुँदै कांग्रेसको राजनीतिमा जोडिएका रिजालले आफ्नो राजनीतिक यात्रालाई अब पार्टीको केन्द्रीय तहसम्म विस्तार गर्न खोजेका हुन् । 

उनका अनुसार कलाकार तथा कला क्षेत्रसँग सम्बन्धित विषयहरू विभिन्न समयमा उठ्ने गरे पनि तिनलाई नीतिगत रूपमा सम्बोधन गर्न राजनीतिक तहमा बलियो प्रतिनिधित्व आवश्यक छ ।

यसअघि पार्टीको तल्लो तहदेखि महाधिवेशन प्रतिनिधिसम्मको जिम्मेवारी सम्हाल्दै आएका रिजालले अब केन्द्रीय सदस्य बनेर कला, संस्कृति र कलाकारका मुद्दालाई पार्टीको नीति निर्माणसँग जोड्ने लक्ष्य लिएका छन् ।

हास्य कलाकारका रूपमा दर्शकमाझ परिचित रिजालको कांग्रेसको केन्द्रीय सदस्य पदमा उम्मेदवारीले भने १५औँ महाधिवेशनमा कला क्षेत्रबाट हुने राजनीतिक प्रतिनिधित्वलाई पनि चासोको विषय बनाएको छ ।