काठमाडौं– पहिलो संस्करणको नेपाल भलिबल लिग (एनभीएल) मा सगरमाथा स्म्यासर्सले बिजयी सुरुवात गरेको छ । 

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको उद्घाटन खेलमा मधेश वारियर्सलाई ३–१ को सेटमा पराजित गर्दै सगरमाथा स्म्यासर्सले बिजयी सुरुवात गरेको हो । खेलमा सगरमाथाले मधेशलाई २५–२१, २५–२१ र २३–२५ र २५–१५ ले पराजित गरेको हो ।

भदौ २७ गतेसम्म सञ्चालन हुने एनभिएलमा ६ टोली सहभागी छन् । सबै टोलीले सिंगल राउन्ड रोबिनका आधारमा लिग खेल्नेछन् । लिगको शीर्ष स्थानमा रहने टोली सिधै फाइनलमा पुग्नेछ । 

दोस्रो र तेस्रो स्थानका टोलीले फाइनल प्रवेशका लागि प्लेअफ खेल्नेछन् । पहिलोपटक आयोजना भएको एनभिएलमा नेपाली भलिबल इतिहासकै सर्वाधिक २० लाख रुपैयाँको विजेता पुरस्कार घोषणा गरिएको छ ।