अछाम- रसुवागढी तथा तल्लो तटीय क्षेत्रमा भदौ १० गते आएको भीषण बाढीबाट भएको जनधनको क्षतिप्रति पञ्चदेवल विनायक नगरपालिकाले राहत तथा पुनर्स्थापनाका लागि ३२ लाखभन्दा बढी रकम सहयोग गर्ने भएको छ।

नगर कार्यपालिकाको भदौ १७ गते बसेको बैठकले प्रधानमन्त्री दैवी प्रकोप उद्धार कोषमा रकम जम्मा गर्ने निर्णय गरेको हो।

नगरपालिकाका अनुसार जनप्रतिनिधिको सेवा सुविधाबापत १ लाख २९ हजार २३३ रुपैयाँ, कर्मचारीको तलबबाट ७ लाख ६ हजार ४१२ रुपैयाँ, शिक्षक तथा विद्यालय कर्मचारीबाट २२ लाख १२ हजार २ रुपैयाँ र प्रकोप व्यवस्थापन कोषबाट २ लाख ८५ हजार ६८६ रुपैयाँ उपलब्ध गराइनेछ।

नगरपालिकाले बाढीका कारण रसुवा, नुवाकोट, धादिङ, चितवनलगायत जिल्लामा भएको ठूलो जनधनको क्षतिप्रति दुःख व्यक्त गर्दै विपत्तिमा परी ज्यान गुमाउनेहरूप्रति श्रद्धाञ्जली तथा शोकसन्तप्त परिवारजनमा समवेदना प्रकट गरेको छ। साथै घाइतेहरूको शीघ्र स्वास्थ्यलाभको कामना गरेको छ।

नगरपालिकाले राष्ट्रिय विपत्तिको यस दुःखद् घडीमा क्षतिग्रस्त सार्वजनिक संरचना तथा भौतिक पूर्वाधारको पुनर्निर्माण, घाइतेको उद्धार तथा उपचार र प्रभावितको पुनर्स्थापनामा सहयोग पुग्ने विश्वास व्यक्त गरेको छ।