काठमाडौं- युक्रेनमा जारी युद्ध अन्त्यका लागि कूटनीतिक पहलले तीव्रता पाएको छ । यसै सिलसिलामा अमेरिकी राष्ट्रपति डोनल्ड ट्रम्पका विशेष दूतहरू ज्यारेड कुश्नर र स्टिभ विट्कफले रुसको भ्रमण गर्ने तयारी गरेका छन् ।

रुसको भ्रमणपछि उनीहरू युक्रेनको राजधानी किभ जाने कार्यक्रम रहेको छ। यसअघि अमेरिकी गुप्तचर संस्था सीआईएका निर्देशक जोन र्‍याटक्लिफले पनि रुसको भ्रमण गरिसकेका छन् । पछिल्लो समय अमेरिका र रुसबीचको यो उच्चस्तरीय संवादलाई युक्रेन संकट समाधानको सम्भावित मार्गचित्रसँग जोडेर निकै अर्थपूर्ण रूपमा हेरिएको छ।

युक्रेनी राष्ट्रपति भोलोदिमिर जेलेन्स्कीले पनि अमेरिकी दूतहरूसँगको निरन्तरको टेलिफोन संवाद र आगामी भ्रमणको तयारीबारे पुष्टि गरेका छन्। विश्लेषकहरूले अमेरिकी दूतहरूको यस दोहोरो भ्रमणले आगामी दिनमा शान्ति वार्ताको वातावरण निर्माण गर्न महत्त्वपूर्ण भूमिका खेल्न सक्ने बताएका छन् ।