काठमाडौं– कोशी प्रदेशका इलाम, पाँचथर, ताप्लेजुङ र तेह्रथुम जिल्लाका मेयर, गाउँपालिका अध्यक्ष तथा प्रमुख प्रशासकीय अधिकृतसहित २१ सदस्यीय टोली अध्ययन भ्रमणका लागि भारत प्रस्थान गरेको छ।

भारत सरकारको क्षमता अभिवृद्धि कार्यक्रमअन्तर्गत आयोजना गरिएको भ्रमणमा टोलीले भारतको हैदराबादस्थित राष्ट्रिय ग्रामीण विकास तथा पञ्चायती राज संस्थानमा कृषि, दिगो विकास र सुशासनसम्बन्धी विशेष तालिम लिनेछ।

भारतीय पक्षका अनुसार यो कार्यक्रम नेपाल र भारतबीच ज्ञान आदानप्रदान, संस्थागत क्षमता अभिवृद्धि तथा दुई देशबीचको दीर्घकालीन साझेदारीलाई थप सुदृढ बनाउने उद्देश्यका साथ सञ्चालन गरिएको हो।

हालका वर्षहरूमा स्थानीय तहका नेपाली जनप्रतिनिधिहरूको भारत अध्ययन भ्रमणको यो चौथो टोली हो। 

यसअघि कोशी प्रदेशको सङ्खुवासभा, कर्णाली प्रदेशको हुम्ला तथा सुदूरपश्चिम प्रदेशका डडेल्धुरा, बैतडी र दार्चुलाका स्थानीय तहका प्रतिनिधिमण्डलले पनि यस्तै अध्ययन भ्रमण गरेका थिए।

भारतीय पक्षले यस्ता कार्यक्रममार्फत नेपाल र भारतबीच स्थानीय तहको स्तरमा द्विपक्षीय सहकार्यलाई थप विस्तार र सुदृढ बनाउँदै लगिएको जनाएको छ।