काठमाडौँ – मिक्स मार्सल आर्ट्स (एमएमए) का चर्चित ब्राजिलियन फाइटर एलान नासिमेन्टोको ३४ वर्षको उमेरमा निधन भएको छ। उल्टिमेट फाइटिङ च्याम्पियनसिप (युएफसी) ले सोमबार उनको निधन भएको पुष्टि गरेको हो।

युएफसीका अनुसार फ्लाइवेट श्रेणीका फाइटर नासिमेन्टो सोमबार बिहान सुतेकै अवस्थामा हृदयघात भएपछि अचेत भेटिएका थिए। “स्वास्थ्यकर्मीको टोलीले बचाउने प्रयास गरे पनि उनलाई घटनास्थलमै मृत घोषित गरिएको थियो,” युएफसीद्वारा जारी विज्ञप्तिमा भनिएको छ,एलानका परिवार, साथीभाइ, टोलीका साथीहरू र प्रियजनहरूप्रति छ समवेदना छ ।”

ब्राजिलका नासिमेन्टो सन् २०२१ देखि युएफसीसँग आबद्ध थिए। उनले गत जुनमा मिच रापोसोविरुद्ध आफ्नो अन्तिम प्रतिस्पर्धा खेलेका थिए, जसमा उनी स्प्लिट-डिसीजनका आधारमा पराजित भएका थिए।

समग्र एमएमए करिअरमा २२ जित र ७ हारको कीर्तिमान बनाएका नासिमेन्टोको युएफसी यात्रा भने ४ जित र २ हारमा सीमित रहन पुग्यो। उनको अप्रत्यासित निधनले विश्व मार्सल आर्ट्स खेल क्षेत्र स्तब्ध बनेको छ।