काठमाडौं– काठमाडौंको तारकेश्वर–मनमैजु क्षेत्रमा अवैध रूपमा वन्यजन्तुको अखेटोपहार (हात्तीको दाह्रा) ओसारपसार, बिक्री वितरण तथा सञ्चय गरेको आरोपमा पाँचजना पक्राउ परेका छन् ।

काठमाडौं उपत्यका अपराध अनुसन्धान कार्यालय, टेकुको टोलीले जेठ १९ गते मनमैजु क्षेत्रमा छापा मारेर हात्तीको दाह्रा र लागूऔषध बरामद गरेको हो ।

प्रहरीका अनुसार तारकेश्वर–९ मनमैजुस्थित २५ वर्षीय राजिव महर्जनको घर नजिकैको खाली जग्गामा गाडेर राखिएको अवस्थामा दुई थान हात्तीको दाह्रा फेला परेको थियो ।

सोही क्रममा घरभित्रबाट ‘टर्माडो-५०’ लेखिएको १५० क्याप्सुल लागुऔषध पनि बरामद गरिएको छ ।

अनुसन्धानका क्रममा थप दुई टुक्रा हात्तीको दाह्रा टोखा–२ सपनतिर्थ बस्ने २४ वर्षीय पुरन बोहरासँग रहेको खुल्न आएको थियो ।

बोहराको बयानका आधारमा ती दाह्रा मनमैजु बस्ने २० वर्षीय सन्तबहादुर भुजेललाई दिएको तथ्य खुलेपछि प्रहरीले भुजेलको कोठामा छापा मारी झोलाभित्र लुकाइराखिएको अवस्थामा थप दुई थान दाह्राका टुक्रा बरामद गरेको जनाएको छ ।

घटनामा संलग्न आरोपमा राजिव महर्जन, २७ वर्षीय आयुष महर्जन, २६ वर्षीय टेकप्रसाद गुरुङ, पुरन बोहरा र सन्तबहादुर भुजेल पक्राउ परेका छन् ।

राजीव महर्जन, आयुष महर्जन र टेकप्रसाद गुरुङमाथि लागूऔषध नियन्त्रण ऐन, २०३३ तथा राष्ट्रिय निकुञ्ज तथा वन्यजन्तु संरक्षण ऐन, २०२९ अन्तर्गत अनुसन्धान भइरहेको छ ।

पुरन बोहरा र सन्तबहादुर भुजेलमाथि भने राष्ट्रिय निकुञ्ज तथा वन्यजन्तु संरक्षण ऐन, २०२९ अन्तर्गत थप अनुसन्धान तथा कारबाही अघि बढाइएको प्रहरीले जनाएको छ ।

पक्राउ परेका व्यक्तिहरूलाई थप अनुसन्धान र कानुनी कारबाहीका लागि जिल्ला प्रहरी परिसर काठमाडौं तथा डिभिजन वन कार्यालय, हात्तीसार पठाइएको छ ।