काठमाडौं– नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकमा निजी क्षेत्रलाई हेर्ने दृष्टिकोण परिवर्तन हुँदै गएको बताएका छन् । 

आइतबार महासंघले ललितपुरमा आयोजना गरेको सम्मान कार्यक्रममा अध्यक्ष ढकालले पहिले निजी क्षेत्रलाई हेर्ने दृष्टिकोण एउटा नकारात्मक रहेकोमा अहिले दृष्टिकोण परिवर्तन हुँदै गएको र मुलुकको विकासका लागि योगदान दिने क्षेत्रका रुपमा हेर्ने गरेको बताए ।

अहिले दुई तिहाई नजिकको सरकारले समेत निजी क्षेत्रलाई सँगै लिएर अघि बढ्ने प्रतिबद्धता जनाएको उनले बताए । उनले रास्वपा नेतृत्वसँगको छलफलमा निजीले भोग्नुपरेको समस्यामा बारेमा जानकारी गराइएको उल्लेख गरे । 

उनले महासंघको साधारणसभाबाट नयाँ कार्यसमिति चयन चुनावी प्रक्रियाबाट हुने निश्चित भएको भन्दै चुनावी प्रक्रियालाई स्वच्छ बनाउन आग्रह गरे । 

नयाँ कार्यसमिति चयनपछि एक भएर महासंघलाई अघि बढाउन उनले आग्रह गरे । महासंघको ६० औं साधारणसभा सोमबारबाट सुरु हुँदैछ ।