ललितपुर- नेपाल कम्युनिष्ट पार्टी (एमाले) को केन्द्रीय सचिवालयको सातौं बैठकले नेपाली सेना, प्रहरी लगायत राज्यका सबै सुरक्षा निकाय र निजामती प्रशासनसँग पार्टीको सम्बन्ध पूर्ववत् मित्रवत् रहेको बताएको छ।

एमालेको सचिवालय बैठकले राज्यका यी अंगसँग भविष्यमा पनि थप सुदृढ बनाइने स्पष्ट गरेको छ ।

बैठकले बिहीबार प्रतिनिधिसभाको पहिलो बैठकमा संसदीय दलका नेता रामबहादुर थापा बादलले गरेको सम्बोधनमाथि गम्भीर छलफल गर्दै यो धारणा सार्वजनिक गरेको हो । बादलले राष्ट्रिय स्वतन्त्र पार्टीलाई सेना र कर्मचारीसहितले चुनाव जिताइदिएको बताएपछि विवाद भएको थियो ।

‘मुलुकको संविधान र प्रचलित कानुनबमोजिम निर्माण भएका नेपाली सेनालगायत राज्यका सबै सुरक्षा निकाय, निजामती प्रशासन र अन्तर्राष्ट्रिय समुदायप्रति हाम्रो पार्टीको सम्बन्ध पूर्ववत् एवम् मित्रवत् रहेको र यस्तो सम्बन्ध भविष्यमा अझ सुदृढ बनाइने कुरा स्पष्ट पारेको छ’, एमालेले भनेको छ।