मनामाह- इरानी क्षेप्यास्त्र प्रहारका कारण बहराइनमा रहेको अमेरिकी प्रविधि कम्पनी अमेजनको क्लाउड केन्द्रमा क्षति पुगेको छ । बुधबार भएको यस आक्रमणबारे एक जानकार स्रोतले फाइनान्सियल टाइम्सलाई जानकारी दिएको हो ।

बहराइनको आन्तरिक मन्त्रालयले पनि सो दिन इरानी आक्रमणका कारण एउटा कम्पनीको भवनमा लागेको आगो निभाएको पुष्टि गरेको छ । यद्यपि मन्त्रालयले कम्पनीको नाम भने खुलाएको थिएन ।

यो आक्रमण बहराइनको हमालामा रहेको बाटेल्को केन्द्रलाई लक्षित गरी भएको जनाइएको छ । सो भवनभित्र अमेजन वेब सर्भिसको पूर्वाधार रहेको छ ।

अमेजनले सन् २०१९ देखि बहराइनमा आफ्नो सेवा विस्तार गरेको थियो । यसअघि मार्च २ मा पनि संयुक्त अरब इमिरेट्स र बहराइनमा रहेका आफ्ना डाटा सेन्टरहरूमा ड्रोन आक्रमण भएको अमेजनले स्वीकार गरेको थियो ।

इरानको इस्लामिक रिभोलुसनरी गार्ड कोरले केही दिनअघि मात्रै अमेरिकी प्रविधि कम्पनीहरूलाई सैन्य निसानामा राख्ने घोषणा गरेको थियो ।

इरानका अनुसार यी कम्पनीहरूले हत्याका योजना बनाउन र ट्र्याकिङ गर्न मुख्य भूमिका खेलिरहेका छन् । इरानले यस्ता कार्यमा संलग्न संस्थाहरूलाई वैध सैन्य लक्ष्य मानिने चेतावनी दिएको छ ।