काठमाडौं – अमेरिका–इजरायल र इरानबीच जारी सैन्य द्वन्द्व आज चौथो दिनमा प्रवेश गरेको छ । अमेरिकी राष्ट्रपति डोनाल्ड ट्रम्पले इरान वार्ता गर्न इच्छुक रहे पनि अब ढिलो भइसकेको टिप्पणी गरेका छन् ।

सामाजिक सञ्जालमार्फत ट्रम्पले इरानको रक्षा प्रणाली र नेतृत्व संरचना लगभग ध्वस्त भइसकेको दाबी गर्दै इरानको एयर डिफेन्स, एयर फोर्स र नेवी ठूलो क्षतिमा परेको बताएका छन् । यद्यपि, यसअघि आइतबार उनले इरानी नेताहरूसँग वार्ताका लागि आफू तयार रहेको संकेत दिएका थिए । यसले अमेरिकी धारणा र रणनीतिबारे मिश्रित सन्देश गएको विश्लेषण गरिएको छ।

उता, रुसी राष्ट्रपति भ्लादिमीर पुटिनले इरानसँग वार्ता गर्ने तयारी गरेका छन् । मध्यपूर्व क्षेत्रमा भइरहेको आक्रमण रोक्ने र बढ्दो तनाव कम गर्ने उद्देश्यले कूटनीतिक पहल अघि बढाइएको जनाइएको छ ।

पुटिनले साउदी अरेबियाका क्राउन प्रिन्स मोहम्मद बिन सलमान र कतारका अमिर शेख तमीम बिन हमद अल थानीसँग टेलिफोन वार्ता गरिसकेका छन् । दुवै नेताले जारी द्वन्द्वका गम्भीर परिणामबारे चिन्ता व्यक्त गर्दै तनाव घटाउन कूटनीतिक प्रयास आवश्यक रहेको धारणा राखेका छन् ।

लगातार चर्किँदै गएको यस द्वन्द्वले मध्यपूर्व क्षेत्रको सुरक्षा अवस्था थप जटिल बनाएको छ भने अन्तर्राष्ट्रिय समुदायले संयमता र वार्ताको मार्ग अपनाउन आह्वान गरिरहेको छ।