काठमाडौं– अमेरिका र इजरायलले इरानमा आक्रमण गरेपछि मध्यपूर्वबाट हुने हवाई उडान अनिश्चित भएको छ।

कतार एयरवेजले मंगलबार आफ्नो सामाजिक सञ्जाल प्लेटफर्म एक्समार्फत क्षेत्रीय एयरस्पेस बन्द भएका कारण उडानका सबै अपरेसन केही समयका लागि स्थगित गरिएको जनाएको छ।

एयरस्पेस सुरक्षित खुल्ने घोषणा भएपछि मात्रै उडानहरू पुनः सुरू हुने कतार एयरवेजले जनाएको छ। कम्पनीले अर्को अपडेट ४ मार्चको बिहान ९ बजे सम्म दिने जानकारी दिएको छ।

त्यस्तै, एतिहाद एयरवेजले पनि अबू धाबीबाट सञ्चालन हुने सबै नियमित उडानहरू यूएई समयानुसार ५ मार्चसम्म स्थगित गरिएको जनाएको छ।

केही विशेष, कार्गो र प्रत्यावर्तन उडानहरू मात्रै यूएई अधिकारीको अनुमति पाएपछि सञ्चालन हुन सक्नेछन्। यात्रुलाई एयरपोर्टमा जानुअघि कम्पनीसँग प्रत्यक्ष सम्पर्क गर्न निर्देशन दिइएको छ।

बिनापक्का टिकट प्रवेश अनुमति नहुने जनाइएको छ। यात्रुहरूले आफ्नो उडानको अवस्था कम्पनीको वेबसाइटमा जाँच गर्न र सम्पर्क विवरण अद्यावधिक गर्न पनि सुझाव दिइएको छ।

कम्पनीले २८ फेब्रुअरीसम्म जारी टिकट र १० मार्चसम्मको यात्रा गर्ने यात्रुहरूलाई ३१ मार्चसम्म बिना अतिरिक्त शुल्क नयाँ मिति लिन सक्ने व्यवस्था गरेको छ।

१० मार्चसम्मको उडानका यात्रुहरूले रिफंडको लागि आवेदन गर्न सक्नेछन् वा आफ्ना ट्राभल एजेन्टसँग सम्पर्क गर्न सक्नेछन्।

एयरलाइनले यात्रुको सुरक्षा आफ्नो सर्वोच्च प्राथमिकता भएको र सबै सेवाहरू सुरक्षा मापदण्ड पूरा भएपछि मात्रै सुरु हुने जनाएको छ।