काठमाडौं- मौरिससले भारतसँग पेट्रोलियम पदार्थ आयात गर्ने सम्झौतामा हस्ताक्षर गरेको छ । यो सम्झौता दीर्घकालीन आपूर्ति व्यवस्थाको एक हिस्सा भएको जनाइए पनि यसको परिमाण तथा अन्य व्यावसायिक र वित्तीय सर्तबारे भने खुलाइएको छैन ।

भारतका पेट्रोलियममन्त्री हरदीप पुरीले मौरिससको भ्रमण गर्ने क्रममा यी सम्झौताहरूमा हस्ताक्षर भएका हुन् । आयातमा अत्यधिक निर्भर मुलुक मौरिससले इरानमा जारी युद्धका कारण वित्तीय समस्याको समना गरिरहेको छ ।

मौरिसस सरकारले जारी गरेको विज्ञप्ति अनुसार यस सम्झौतामा तेल तथा ग्यास सहकार्यसम्बन्धी दुई सरकारबीचको समझदारी पत्र र इन्डियन आयल कर्पोरेसनसँगको खरिद-बिक्री सम्झौता समावेश छ । उक्त खरिद-बिक्री सम्झौताले पेट्रोल, डिजेल र विमान इन्धन (एभिएसन फ्युल) लगायतका पेट्रोलियम पदार्थको आपूर्तिलाई समेट्छ ।

मन्त्री पुरीले दक्षिण एसिया बाहिर भारतीय सार्वजनिक क्षेत्रको तेल कम्पनीसँग यस्तो प्रकारको सम्झौता गर्ने मौरिसस पहिलो राष्ट्र भएको बताएका छन् ।