काठमाडौं- प्रतिपक्षी नेपाली कम्युनिष्ट पार्टीका नेता एवम् पूर्वअर्थमन्त्री वर्षमान पुनले प्रधानमन्त्री बालेन्द्र शाहसँग भेटवार्ता गरेका छन्।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा बिहीबार भएको भेटमा रसुवाको भोटेकोशी नदीमा आएको बाढी तथा त्यसपछिको खोज तथा उद्धार, उपचार र राहत वितरणलगायत विषयमा छलफल भएको छ।

भेटमा बाढीबाट प्रभावित पूर्वाधारलाई कसरी पुनः सञ्चालनमा ल्याउने भन्ने विषयमा पनि कुराकानी भएको जनाइएको छ।

प्रधानमन्त्री शाहसँग यसअघि उज्यालो नेपाल पार्टीका अध्यक्ष कुलमान घिसिङले पनि भेट गरेका थिए। उक्त भेटमा पनि बाढीलगायत समसामयिक विषयमा छलफल भएको जनाइएको छ।

प्रम बालेन बल्ल राजनीतिक भेटघाटमा जुटेका छन् । भदौ १० को बाढीपछि सरकारकोतर्फबाट सर्वदलीय बैठक पनि राख्न नसकेका उनले व्यक्तिगत रुपमा भेटघाट थालेका हुन्।