काठमाडौँ – ‘हिमालयन चितुवा’का नामले परिचित नेपाली युवा बक्सर अविरल घिमिरे ‘हिट किक बक्सिङ–५९ अन्तर्राष्ट्रिय प्रतियोगिता’मा उत्रिने भएका छन्। जापानको करिया सहरमा भदौ २० गते आयोजना हुने अन्तर्राष्ट्रिय किक बक्सिङ एसोसिएसन (इस्का वर्ल्ड मेन इभन्ट) मा उनले फ्रान्सका बक्सर माथन स्वीनार्डसँग प्रतिस्पर्धा गर्नेछन्।

हालसम्म २८ भन्दा बढी अन्तर्राष्ट्रिय प्रतियोगिता खेलिसकेका घिमिरेले २० वटामा जित हात पारिसकेका छन्। उनी हिट किक बक्सिङमा चार पटक ‘टाइटल डिफेन्स’ गर्न सफल खेलाडी हुन्।

घिमिरेले यसअघि हिट किक बक्सिङ टाइटल म्याच, अन्तर्राष्ट्रिय किक बक्सिङ एसोसिएसन टाइटल तथा के-वन क्रस १७५ र १८२ गरी दुई पटक टाइटल म्याच जितिसकेका छन्। अन्तर्राष्ट्रिय रिङमा नेपालको नाम उच्च राख्न सफल घिमिरेलाई किक बक्सिङका अब्बल नेपाली खेलाडीका रूपमा हेरिन्छ।