दोलखा– दुर्लभ तथा संरक्षित वन्यजन्तु सालकको खपडा लुकाई राखेको आरोपमा दोलखाको शैलुङ गाउँपालिका–२ पोर्सबका ६६ वर्षीय मनोज कुमार तामाङ पक्राउ परेका छन् ।

विशेष सूचनाको आधारमा खटिएको प्रहरी टोलीले बिहीबार बिहान करिब ८:३० बजे तामाङको घरमा खानतलासी गर्दा घरको भित्तामा फलामको किल्लाले झुण्ड्याएर राखिएको अवस्थामा सालकको खपडा जस्तो देखिने वस्तु फेला पारेको जनाएको छ ।

प्रहरीका अनुसार तामाङले आफ्नै घरको कोठामा प्रतिबन्धित वन्यजन्तुको अङ्ग लुकाई राखेको भन्ने गोप्य सूचना प्राप्त भएपछि खोजतलास गरिएको थियो। सो क्रममा बरामद गरिएको शङ्कास्पद वस्तु नियन्त्रणमा लिइएको छ ।

घटनापछि तामाङलाई नियन्त्रणमा लिएर बरामद सामग्रीसहित थप अनुसन्धान तथा आवश्यक कानुनी कारबाहीका लागि डिभिजन वन कार्यालय चरिकोट पठाइएको प्रहरीले जनाएको छ ।

वन्यजन्तुको अङ्ग–प्रत्यङ्गको ओसारपसार, खरिदबिक्री वा भण्डारण कानुनले निषेध गरेको छ। बरामद वस्तु सालककै खपडा भएको पुष्टि भए वनसम्बन्धी प्रचलित कानुनअनुसार कारबाही प्रक्रिया अगाडि बढाइने सम्बन्धित निकायले जनाएको छ । सुवाश बस्नेत /दोलखा