तेहरान- अमेरिकी राष्ट्रपति डोनाल्ड ट्रम्पले सोमबार इजरायली प्रधानमन्त्री बेन्जामिन नेतन्याहूलाई फोन गरेर हपारेका छन् ।

सोमबार भएको फोन वार्ताका क्रममा लेबनानमा इजराइली सैन्य कारबाहीप्रति ट्रम्पले कडा रोष व्यक्त गरेका हुन्।

एक्सियोसको रिपोर्ट अनुसार, ट्रम्पले नेतन्याहूलाई सोझै हकार्दै भने, ‘के तिमी पागल भइसक्यौ… तिमी के गर्दैछौ?’

रिपोर्ट अनुसार यो कुराकानी त्यतिबेला भएको थियो, जब इरानले यदि लेबनानमा सैन्य कारबाही जारी रहेमा अमेरिकासँग भइरहेको कूटनीतिक वार्ता रोक्न सक्ने चेतावनी दिएको थियो। त्यसपछि ट्रम्पले उक्त मामिलामा प्रत्यक्ष हस्तक्षेप गरेका थिए।

एक अमेरिकी अधिकारीले एक्सियोसलाई बताए अनुसार ट्रम्प इजरायलको कारबाहीलाई अत्यधिक आक्रामक ठानिरहेका छन्। उनलाई हिजबुल्लाह कमान्डरलाई लक्ष्य बनाउने नाममा पूरै भवनहरू ध्वस्त पारिँदै गरेको कुरामा आपत्ति थियो ।

ट्रम्पले नेतन्याहूलाई यी गतिविधिका कारण विश्वमा इजरायलप्रति आक्रोश बढिरहेको बताएका थिए । ट्रम्पले भने, ‘अहिले सबैलाई तिमीबाट घृणा लाग्छ। यसले गर्दा सबैलाई इजरायलप्रति घृणा लाग्छ।’

यद्यपि कुराकानीपछि नेतन्याहूको कार्यालयले विज्ञप्ति जारी गर्दै इजरायलको नीतिमा कुनै परिवर्तन नभएको बताएको छ। रिपोर्ट अनुसार कुराकानीको अन्त्यमा नेतन्याहूले भने, ‘ठीक छ, ठीक छ, केवल यो सुनिश्चित गर्नुहोस् कि सबै कुरा व्यवस्थापन भयो।’