काठमाडौं– नेपाली कांग्रेसले असोज १८ गतेदेखि काठमाडौंमा सुरु हुने पार्टीको १५ औँ महाधिवेशनको तयारी अन्तिम चरणमा पुगेको जनाएको छ ।

शुक्रबार पार्टी कार्यालय सानेपामा पत्रकार सम्मेलन गर्दै कांग्रेसले महाधिवेशनका लागि आवश्यक प्राविधिक तथा व्यवस्थापकीय तयारी अन्तिम चरणमा पुगेको जनाएको हो । 

कांग्रेस प्रवक्ता देवराज चालिसेले महाधिवेशनमा प्रचारप्रसारका नाममा कुनै तामझाम नगर्ने निर्णय पार्टीले लिएको बताए । महाधिवेशनमा वातावरणमैत्री प्रचारप्रसार गर्नका लागि सबै उम्मेदवारहरूलाई आग्रह गरिएको उनले बताए ।  

महाधिवेशनमा सात हजार सात सयभन्दा प्रतिनिधिहरू सहभागी हुदैछन् । काँग्रेसको इतिहासमा नै पहिलोपटक यति ठूलो संख्यामा महाधिवेशन प्रतिनिधिहरू निर्वाचित भएको प्रवक्ता चालिसेले बताए। महाधिवेशन अन्तर्गत असोज १८ गते उद्घाटन, १९ र २० गते बन्द सत्र र २१ र २२ गते निर्वाचन प्रक्रिया हुने उनले जानकारी दिए  ।

उनले महामन्त्री प्रदीप पौडेलको संयोजकत्वमा रहेको विधान संशोधन समितिले सुझाव संकलन र छलफल जारी भन्दै विधान संशोधनमार्फत शेर बहादुर देउवा लगायत पूर्व सभापतिहरूको मर्यादा र स्थान कहाँ रहने भन्ने विषयलाई पनि समेटिने बताए ।

उनले महाधिवेशनलाई केवल ’नेता चयन गर्ने’ थलोमा मात्र सीमित नराखी नीतिगत बहस र देशको परिकल्पनामा बढी केन्द्रित गराउने प्रयास गरिएको उल्लेख गरे । प्रवक्ता चालिसेले पार्टीको नेतृत्व चयनका विषयमा ठूलो विवाद नरहेको समेत दाबी गरे । 

उनले देशका ६,७४३ वडा तहदेखि भएका अधिवेशनहरूमा ९९ प्रतिशत भन्दा बढी सदस्यहरूको उपस्थिति रहेकाले पार्टीको आधिकारिकता र वैधानिकतामा कुनै कानुनी वा राजनीतिक शंका नरहेको स्पष्ट पारे । 

कांग्रेसको केन्द्रीय महाधिवेशनको उद्घाटन असोज १८ गते खुल्ला मञ्च गर्ने तय भएको छ ।