काठमाडौं – राष्ट्रिय प्रजातन्त्र पार्टी (राप्रपा)का सांसद ज्ञानबहादुर शाहीले ‘जेनजी’ आन्दोलनका क्रममा भएका घटनाको छानबिन गर्न गठित प्रतिवेदनले दोषी ठहर गरेका तथा भ्रष्टाचारमा संलग्न व्यक्तिलाई कारबाही गर्न सरकारसँग माग गरेका छन्।

प्रतिनिधिसभाको आजको बैठकमा समय लिएर बोल्दै शाहीले अपराधजन्य घटनामा दोषी प्रमाणित भएका सबैलाई कानुनअनुसार कारबाही गरिनुपर्ने बताए। दोषीमाथि कारबाही भए त्यसमा आफ्नो पार्टीको समर्थन रहने उनको भनाइ थियो।

शाहीले युवालाई रोजगारीका लागि विदेश जानुपर्ने बाध्यता अझै अन्त्य हुन नसकेको भन्दै स्वदेशमै रोजगारी सिर्जना गर्ने गरी उद्योग तथा कलकारखानाको विकास गर्न सरकारको ध्यानाकर्षण गराए।

उनले स्वास्थ्य संस्थाको विस्तार र गुणस्तरीय स्वास्थ्य सेवा सुनिश्चित गर्न पनि सरकारसँग आग्रह गरे।

यस्तै, बाढीपीडितलाई उचित राहत र क्षतिपूर्ति उपलब्ध गराउँदै प्रभावितको शीघ्र पुनःस्थापनाका लागि ठोस कार्यक्रम ल्याउन उनले सरकारको ध्यानाकर्षण गराए।