काठमाडौँ – भदौ १० गते रसुवाको भोटेकोसीमा आएको विनाशकारी बाढीमा परी बेपत्ता भएका एकै परिवारका पाँच जना सदस्य नभेटिएपछि पीडित परिवार अन्तिम संस्कारको निर्णयमा पुगेको छ । लामो समयसम्म निरन्तर खोजी गर्दा पनि फेला नपरेपछि पत्रकार निराजन पौडेलको परिवारले बुबा, आमा, काका, काकी र बहिनीको अन्तिम संस्कार सुरु गर्ने निर्णयमा पुगेको जानकारी गराएका हुन् ।

पीडित परिवारका अनुसार काठमाडौँको तारकेश्वर नगरपालिका–लोलाङ बोहोराटार गेटबाट सुनौलो बस्ती जाने बाटोमा रहेको रुद्रमती महादेव मन्दिर तथा किरियापुत्री भवनमा अन्तिम संस्कारको धार्मिक विधि सम्पन्न गर्ने जनाएको हो । बाढी आएको एक साताभन्दा बढी समय बितिसक्दा पनि बेपत्ता आफन्तको अत्तोपत्तो नभएपछि आफन्त परम्पराअनुसार काजकिरियामा बस्न लागेका हुन् ।

निराजनले फेसबुकमा लेखेका छन्, ‘भदौ १० गते आएको भोटेकोशी बाढीमा परेर वेपत्ता हुनुभएका हाम्रा अभिभावक बुवा, आमा, अंकल, अन्टी, बहिनीको खोजी कार्यगर्दा पनि नभेटिएपछि आजदेखि हामी अन्तिम संस्कार गर्ने निर्णयमा पुगेका छौँ ।स्थान: काठमाडौं, तारकेश्वर नगरपालिका लोलाङ बोहोराटार गेटबाट सुनौलो बस्ती जाने बाटो । रूद्रमति महादेव मन्दिर तथा किरियापुत्री भवन ।’