इन्डोनेसिया- आइतबार इन्डोनेसियाली समुद्रबीचमा गुडिरहेको डुंगामा आगो लाग्दा दर्जनौँ व्यक्तिको हताहत भएको छ । डुंगामा आगलागीपछि आत्तिएर यात्रुहरू समुद्रमा हाम फालेपछि पाँच जनाको मृत्यु भएको र अन्य ४१ जना बेपत्ता भएकाे खोज तथा उद्धार अधिकारीहरूले बताएका छन् ।

क्षेत्रीय सुराबाया खोज तथा उद्धार निकायले भनेको छ, ‘जहाजमा सवार पाँच जनाको मृत्यु भएको, ४१ जना बेपत्ता भएका र २२५ जनालाई उद्धार गरिएको छ ।’

इन्डोनेसियाको राष्ट्रिय खोज तथा उद्धार निकाय (बासारनास) का अनुसार डुंगामा आगलागीपछि केही यात्रु आत्तिएर समुद्रमा हाम फालेका थिए र नजिकैको जहाजले उनीहरूलाई समुद्रबाट उद्धार गरेको थियो ।

चार अन्य जहाज डुंगानजिकै तयारी अवस्थामा थिए तर, डुंगामा रहेको ज्वलनशील सामग्रीको जोखिमका कारण नजिक जान असम्भव भएको बासारनासले जानकारी गराएको छ ।

बासारनासले त्यसपछि क्याप्टेनसँग सम्पर्क नभएको बताएको छ । घटनास्थलबाट छ घण्टाको दूरीमा रहेको सुराबायाबाट ठूलो उद्धार टोली घटनास्थलतर्फ गएकाे बताइएकाे छ ।