काठमाडौं– जापानको अर्थतन्त्र उकास्न अमेरिकाले अर्बौ डलर बराबरका येन खरिद गर्ने भएको छ । चार दशक यताकै न्यून विन्दुमा पुगेकोे येनलाई उकास्न जापान र अमेरिकाले संयुक्त प्रयास गर्ने समाचार संस्था रोयटर्सले जनाएको छ ।

यसबारे जापानी अर्थमन्त्री सात्सुकी कातायामाले सोमबार औपचारिक घोषणा गर्नेछन् । अमेरिकाले ५ देखि १० अर्ब डलर बराबरको येन खरिद गर्ने तयारी गरेको बुझिएको छ । मेरिल्याण्ड राज्यको क्याम्प डेभिडमा अमेरिकी अर्थमन्त्री स्कट बेसेन्टको नोटप्याडमा ‘गर्नुपर्ने काम’ मा ५ देखि १० अर्ब डलर बराबरको येन खरिद गर्ने उल्लेख छ ।

यसअघि गत बिहीबर जापान सरकारले न्यूयोर्कको वित्तीय बजारमा अमेरिकी डलरमा येन खरिद गरेको थियो । रोयटर्सका अनुसार जापानको केन्द्रीय बैंकले पनि येनलाई उकास्न ५८ अर्ब ९८ करोड डलर बिक्री गरेको थियो ।

गत शुक्रबार बैंक अफ जापानले मौद्रिक नीतिलाई निरन्तरता दिँदै चाँडै ब्याजदर बढाउने सङ्केत गरेको थियो ।