काठमाडौं – श्रीलङ्काको फ्रेन्चाइज क्रिकेट प्रतियोगिता लंका प्रिमियर लिग (एलपिएल) २०२६ का लागि तीन नेपाली खेलाडी विभिन्न टोलीमा आबद्ध भएका छन् ।

आगामी जुलाई १७ देखि अगस्ट ८ सम्म श्रीलङ्कामा आयोजना हुने एलपिएलको ड्राफ्टमार्फत नेपालका स्टार लेगस्पिनर सन्दीप लामिछाने, अलराउन्डर दीपेन्द्र सिंह ऐरी र ओपनर कुशल भुर्तेल अनुबन्धित भएका हुन् ।

ड्राफ्टअनुसार सन्दीपलाई जाफ्ना किंग्सले अनुबन्ध गरेको छ । यस्तै, दीपेन्द्र सिंह ऐरी पनि जाफ्ना किंग्समै आबद्ध भएका छन् भने विस्फोटक ब्याटर कुशल भुर्तेल कोलम्बो क्याप्समा पुगेका छन् ।

सम्झौता अनुसार सन्दीपले २० हजार अमेरिकी डलर प्राप्त गर्नेछन् । दीपेन्द्र र कुशलले समान १५–१५ हजार अमेरिकी डलर पाउनेछन् ।

यसअघि पनि सन्दीप र दीपेन्द्रले एलपिएलसहित विभिन्न अन्तर्राष्ट्रिय फ्रेन्चाइज प्रतियोगितामा खेलिसकेका छन् । कुशलका लागि भने अन्तर्राष्ट्रिय फ्रेन्चाइज क्रिकेटमा यो पहिलो अनुभव हुनेछ ।