काठमाडौं – हिट फिल्म ‘आमाबाट आमा’का नायिकाहरू सिम्रन पन्त र उषा उप्रेतीलाई नलिइ सिक्वेल ‘आबाट आमा २’को छायाङ्कन सुरु भएको छ ।

गत माघमा प्रदर्शनमा आएको उक्त फिल्मको सिक्वेलमा नायक पल शाह भने दोहोरिएका छन् । दुई नायक आकाश श्रेष्ठ र सबिर श्रेष्ठ थपिएका छन् ।

सिक्वेलमा नायिकामा मलिका महत, रिश्ता गुरुङ र निकिता आचार्य थपिएका छन् । आमाको भूमिकामा रहेकी विपना थापा र बुवाको भूमिकामा रहेको प्रदीप रावत पनि दोहोरिएका छन् ।

गत सोमबार मलिका अनुबन्ध भएको ठीक एक सातापछि फिल्मको छायाङ्कन सुरु भएको हो ।

निर्देशक चन्द्र पन्तको टोलीले चित्लाङबाट छायाङ्कन सुरु गरेको हो । कार्तिक ३० गते प्रदर्शन मिति तोकिएको यो फिल्मको छायाङ्कन लण्डनमा पनि हुने बताइएको छ ।

फिल्मको कथा र पटकथा निर्देशक पन्तकै हो ।