काठमाडौँ – नेपाली राष्ट्रिय क्रिकेट टोलीका आक्रामक ओपनर कुशल भुर्तेलले पुरुष टी-२० अन्तर्राष्ट्रिय क्रिकेटमा नयाँ इतिहास रचेका छन् । चीनविरुद्धको खेलमा एकै ओभरको ६ बलमा ६ छक्का प्रहार गर्दै भुर्तेलले विश्व क्रिकेटको दुर्लभ र प्रतिष्ठित सूचीमा आफ्नो नाम दर्ता गराएका हुन् ।

अन्तर्राष्ट्रिय क्रिकेट परिषद् (आईसीसी) ले सार्वजनिक गरेको पछिल्लो विवरण अनुसार, सन् २०२६ मा चीनविरुद्धको खेलमा यो सनसनीपूर्ण ब्याटिङ गर्दै भुर्तेल विश्व क्रिकेटकै छैटौँ खेलाडी बनेका छन् ।

यसअघि नेपालकै अर्का चर्चित अलराउन्डर दीपेन्द्र सिंह ऐरीले सन् २०२४ मा कतारविरुद्ध एकै ओभरमा ६ छक्का प्रहार गरेर सनसनी मच्चाएका थिए । कुशलको यो सफलतासँगै पुरुष टी-२० अन्तर्राष्ट्रिय क्रिकेटको इतिहासमा एउटै देशबाट दुई अलग-अलग खेलाडीले एकै ओभरमा ६ छक्का प्रहार गरेको यो पहिलो ऐतिहासिक अवसर हो ।

विश्व क्रिकेटमा एउटै ओभरमा ६ छक्का प्रहार गर्नुलाई निकै दुर्लभ र चुनौतीपूर्ण मानिन्छ । कुशल भुर्तेलले यो उपलब्धि हासिल गरेसँगै उनी विश्वका दिग्गज खेलाडीहरूको सूचीमा उभिएका छन् । आईसीसीको सूची अनुसार हालसम्म पुरुष टी-२० अन्तर्राष्ट्रिय क्रिकेटमा यो सफलता प्राप्त गर्ने खेलाडीमा भारतका युवराज सिंहदेखि नेपालका कुशल भुर्तेलसम्म छन् ।

नेपाली ब्याटरले पछिल्लो समय अन्तर्राष्ट्रिय मञ्चमा देखाएको यो आक्रामक रूपले विश्व क्रिकेटलाई नै स्तब्ध बनाएको छ । दुई वर्षअघि दीपेन्द्रले बनाएको कीर्तिमानलाई पछ्याउँदै कुशलले पनि सोही श्रेणीको प्रदर्शन गरेपछि नेपाली क्रिकेटको आक्रामक ब्याटिङ क्षमता विश्वभर चर्चाको विषय बनेको छ । कुशलको यो कीर्तिमानी इनिङ्सले नेपालको टी-२० क्रिकेट यात्रामा अर्को एउटा स्वर्णिम पाना थपेको छ ।

‘सिक्सर क्लब’

युवराज सिंह (भारत) — सन् २००७ (विरुद्ध इङ्गल्यान्ड)

किरोन पोलार्ड (वेस्टइन्डिज) — सन् २०२१ (श्रीलङ्का)

दीपेन्द्र सिंह ऐरी (नेपाल) — सन् २०२४ (कतार)

डारियस विसर (सामोआ) — सन् २०२४ (भानुअतु)

मनान बशिर (बुल्गेरिया) — सन् २०२५ ( जिब्राल्टर)

कुशल भुर्तेल (नेपाल) — सन् २०२६ (चीन)