काठमाडौं- सार्वजनिक जग्गा अतिक्रमण गरेको भन्दै वालेन्द्र शाह नेतृत्वको सरकारले थालेको डोजरको विनाश श्रृंखलाबाट भुइँमान्छेहरू नराम्रोसँग प्रभावित भएका छन् ।

सबै सुकुम्वासीलाई हुकुम्बासीको नाम दिएर काँचा इँटा र ब्रिक्सले बनेका अधिकांश घरमा बडेमानका डोजर चलाउने क्रम जारी छ।

सामान निकाल्न केही घण्टा दिएर हतार हतार डोजर चलाउँदा हजारौँको अहिले बिचल्ली भएको छ। निम्न वर्गमाथि सरकारको यो कठोर कदमको असरले सुकुम्वासीहरूमा गम्भीर मानसिक आघात पर्न थालेको छ।

त्यसकै एक उदाहरण बल्खुबाट आएको छ। शुक्रबार नेपाल प्रहरी, सशस्त्र प्रहरी र काठमाडौं महानगर प्रहरी बलको ठूलो समूह उतारेर थालिएको यो अभियानका क्रममा वर्षौँदेखि आश्रय लिएका झु्प्रा ढल्दा सुकुम्वासीमाथि गहिरो आहत परेको छ।

यस्तै आहत व्यहोरेर शुक्रबार एकजना सुकुमवासी वृद्धले ज्यान गुमाएका छन् । शुक्रबार बिहान डोजरले घरमा हान्न थालेपछि ‘हेर्न सक्दिनँ’ भन्दै विरक्तिएर हिँडेका ६१ वर्षीय इन्द्रबहादुर राई दिउँसोबल्खु खोलामा मृत भेटिए ।

पुर्ख्यौली थलो खोटाङ भएका इन्द्रबहादुर कयौँ वर्षदेखि बल्खु फलफूल तथा तरकारी बजारमा काम गर्दै आएका थिए । निम्न वर्गका श्रमिकको घरमा डोजर बज्रिएपछि हिँडेका उनले बल्खु खोलामा हामफालेर जीवन समाप्त गरेका हुन्।

आफ्ना पति मृत भेटिएको पुष्टि उनकी पत्नी सरिता राईले गरेकी छन् । उनका अनुसार शुक्रबार बिहान घरमा डोजरले हान्न थालेपछि इन्द्रबहादुर विरक्तिँदै हिँडेका थिए । बिहानै घर लडेको दृश्य हेर्न नसक्ने भन्दै रन्थनिएर हिँडेका इन्द्रबहादुरको शव बल्खु खोला किनारमा भेटिएको हो ।

स्थानीयका अनुसार डोजरले घर ढालेको हेर्न नसकेर रन्थनिएका उनले बल्खु खोलामा हामफालेको खुलेको छ । हामफालेपछि उनी निष्प्राण भइसकेको अवस्थामा भेटिएका हुन् ।