काठमाडौं– नेपाल मेडिकल काउन्सिलले विभिन्न देशको नागरिकता लिएर नेपाली नागरिकता त्यागेका १९ जना चिकित्सकको दर्ता (लाइसेन्स) खारेज गरेको छ ।

काउन्सिलका अनुसार अमेरिकादेखि बेलायतसम्मका सात देशका राहदानी लिएका नेपालीमूलका चिकित्सकहरूको नाम दर्ता किताबबाट हटाइएको हो । रजिस्ट्रार डा. सतिश देवका अनुसार यो निर्णय ऐन र नियमावलीमा भएको व्यवस्था कार्यान्वयनका क्रममा गरिएको हो ।

काउन्सिलले नेपाल मेडिकल काउन्सिल ऐन २०२०, नियमावली २०२४ र नेपाली नागरिकता ऐन २०६३ अनुसार नेपाली नागरिकता परित्याग गरी विदेशी नागरिकता लिएका चिकित्सकहरूको लाइसेन्स खारेज गरेको जनाएको छ ।

विवरणअनुसार बेलायतको नागरिकता लिएका ७ जना, अमेरिकाको ५ जना, क्यानडा र न्युजिल्याण्डका २–२ जना तथा जर्मनी, भारत र अष्ट्रेलियाका १–१ जना चिकित्सकको दर्ता खारेज गरिएको हो ।

काउन्सिलले यसलाई औपचारिक निर्णय कार्यान्वयनको प्रक्रिया भएको बताउँदै नामहरू सार्वजनिक गर्ने सूचना मात्र प्रकाशित गरिएको स्पष्ट पारेको छ ।