श्रीनगर- इरानका सर्वोच्च नेता आयतोल्लाह अली खामेनेईको हत्याको खबर सार्वजनिक भएसँगै भारत प्रशासित काश्मीरमा विशाल विरोध प्रदर्शन सुरु भएको छ । श्रीनगरको मुख्य चोकमा भेला भएका हजारौँ शिया मुस्लिमहरूले रातो, कालो र पहेँलो झण्डा बोकेर अमेरिका र इजरायलविरुद्ध चर्को नाराबाजी गरेका छन् ।

प्रदर्शनकारीहरूले खामेनीको तस्बिर अंकित ब्यानर प्रदर्शन गर्दै यस घटनालाई ‘अपराध’ को संज्ञा दिएका छन् । ४० वर्षीय एक प्रदर्शनकारीले एएफपी समाचार एजेन्सीसँग कुरा गर्दै आफूहरूले आफ्नो प्रिय नेता गुमाएको र उनको बाटोमा सधैँ अडिग रहने बताएका छन् । काश्मीरका साथै भारतका अन्य शिया बाहुल्य क्षेत्रहरूमा पनि यस्तै किसिमका प्रदर्शनहरू भएका छन् ।

यसैबीच, इरानमा संवैधानिक प्रक्रिया अनुसार सत्ता हस्तान्तरणको तयारी तीव्र पारिएको छ। संविधानको धारा १११ बमोजिम नयाँ सर्वोच्च नेता चयन नभएसम्मका लागि तीन सदस्यीय अन्तरिम नेतृत्व परिषद् गठन गरिएको छ। यस परिषदमा राष्ट्रपति मसूद पेजेस्कियान, सर्वोच्च अदालतका प्रधानन्यायाधीश घोलम-हुसेन मोहसेनी-इजेई र गार्जियन काउन्सिलका एक प्रतिनिधि रहेका छन् ।