काठमाडौं – आईसीसी टी–२० विश्वकप २०२६ मा पाकिस्तानले भारतसँग हुने समूह चरणको खेल नखेल्ने निर्णय गरेको छ। पाकिस्तान सरकारको आधिकारिक ‘एक्स’ खाताबाट जारी सूचनामा फेब्रुअरी १५ मा तय भएको भारतविरुद्धको खेलमा टोली मैदानमा नउत्रिने स्पष्ट पारिएको हो ।

सरकारी वक्तव्यमा पाकिस्तान टोलीलाई विश्वकप खेल्न श्रीलंका जान अनुमति दिइएको उल्लेख छ, तर भारतसँगको खेलमा सहभागिता नहुने बताइएको छ। पोस्टमा भनिएको छ, ‘पाकिस्तान सरकार पाकिस्तान क्रिकेट टोलीलाई विश्वकपमा सहभागी हुन अनुमति दिन्छ, तर भारतविरुद्ध फेब्रुअरी १५ मा हुने खेल खेलिने छैन।’

यस निर्णयको पछाडि के कारण छ भन्ने विषयमा सरकारले कुनै औपचारिक कारण खुलाएको छैन। तर पछिल्लो समय भारतमै आयोजना हुने प्रतियोगितालाई लिएर पाकिस्तानको असन्तुष्टि बढ्दै गएको देखिन्छ।

यसअघि बंगलादेशले भारतमा खेल्न अस्वीकार गरेपछि आईसीसीले उसलाई प्रतियोगिताबाट हटाएको थियो।

त्यस घटनापछि पाकिस्तानले बंगलादेशको समर्थन गर्दै सरकारसँग छलफलपछि मात्र सहभागिताबारे निर्णय लिने संकेत दिएको थियो।पाकिस्तानले आईसीसीले भारतलाई प्राथमिकता दिएको आरोप लगाउँदै आएको छ।

भारतसँगको खेल बहिष्कार गरे पनि पाकिस्तानले समूह ‘ए’ का अन्य खेल भने खेल्नेछ। पाकिस्तानले फेब्रुअरी ७ मा नेदरल्यान्ड्ससँग पहिलो खेल खेल्ने तालिका छ। त्यसपछि फेब्रुअरी १० मा अमेरिकासँग र फेब्रुअरी १८ मा नामिबियासँग प्रतिस्पर्धा गर्नेछ।