काठमाडौं– काठमाडौंमा जारी राष्ट्रिय लिगमा त्रिभुवन आर्मी क्लबले श्री भगवती क्लबलाई पराजित गरेको छ ।

आइतबार त्रिपुरेश्वरस्थीत दशरथ रंगशालामा भएको खेलमा आर्मीले श्री भगवतीलाई ३–१ गोल अन्तरले पराजित गरेको हो । आर्मीको जितमा जिलेस्पी जंग कार्कीले एक तथा नवयुग श्रेष्ठले दुई गोल गरेका थिए । 

श्री भगवतीका तर्फबाट एकमात्र गोल अजित लामाले गरेका थिए । जितसंगै ५ खेल खेलेको आर्मीको ११ अंक भएको छ भने समान खेल खेलेको श्री भगवतीको ४ अंक रहेको छ ।

त्यस्तै आइतबार नै भएको पहिलो खेलमा प्लानिङ ब्वाइज युनाइटेडले काँक्रे बिहार क्लबलाई ३–० गोल अन्तरले पराजित गर्यो ।

 सातदोवाटोस्थीत एन्फा कम्प्लेक्समा प्लानिङ ब्वाइजलाई जित दिलाउन बविन बोहरा, रोमन भुजेल र हेमन लिम्बूले गोल गरे ।

जितसंगै ५ खेल खेलेको प्लानिङ ब्वाइजले १० अंक जोडेको छ भने समान खेल खेलेको काँक्रे बिहार क्लब अंकबिहीन अवस्थामा रहेको छ ।