काठमाडौं – नेकपा एकीकृत समाजवादीका केन्द्रीय सदस्य वसिम आलमले टिकटक भिडियो सार्वजनिक गरेर पार्टी एकताको पक्षमा उभिन रामकुमारी झाँक्रीलाई आग्रह गरेका छन्।

आलमले अरु दुई युवा नेता र झाँक्री सहितको भिडियो राख्दै ‘बस्नेलाई पिर परेर हुनुसम्म भएको छ जानेलाई नजाऊ भन्न नसकिने रहेछ’ भन्ने बोलको गीतमा टिकटक बनाएका छन्।

सो गीतमा रमाइलो मुद्रामा झाँक्रीले अभिनय गरेकी छिन् भने आलमले पनि अभिनय गरेका छन्। प्रकाश सपूतको ‘पिर’ गीत अन्तर्गतको अंशमा यी दुई नेताहरूले अभिनय गरेका हुन्।

वैचारिक रूपमा हेर्दा रामकुमारी झाँक्री पार्टी माओवादीसँग मिल्नुपर्ने पक्षमा छैनन्। आलम भने माधव नेपाल पक्षका नेता भएकाले उनी माओवादीसँग एकताको पक्षमा रहेको देखिन्छ।

आलम विराटनगरका युवा व्यवसायीसमेत हुन्। उनी लालबाबु पण्डित मन्त्री हुँदा सचिवालयमा बसेर समेत काम गरेका थिए। यस्तै राजेन्द्र राई मुख्यमन्त्री हुँदा उनको जनसम्पर्क सल्लाहकार समेत भएका व्यक्ति हुन्।

एकीकृत समाजवादीका नेताहरूका अनुसार आज नै पार्टी केन्द्रीय कमिटी बैठकले माओवादीसँग एकताको निर्णय गर्ने बताइन्छ। अहिले निर्णायक मन्तव्य समाजवादीका अध्यक्ष नेपालले गरिरहेका छन्।