काठमाडौँ- नेकपा एकीकृत समाजवादीभित्रको किचलो बढ्दै अलग अलग भेलासम्म पुगेको छ।

अध्यक्ष माधवकुमार नेपालविरुद्ध शक्ति संघर्ष गर्दै आएका सम्मानित नेता झलनाथ खनालले आइतबार अलग्गै गुट भेला गरेका छन् ।

उक्त गुट भेलामा महासचिव घनश्या भुसाल र नेतृ रामकुमारी झाँक्रीसमेत मिसिएका छन् ।

उक्त गुट भेलामा उपाध्यक्षसमेत रहेकी जयन्ती राई, डा. विजय पौडेल, केदार सञ्जेल, धर्मराज निरौला, हिरेन्द्र शाही, गरिमा शाह पनि सहभागी छन् ।

त्यसैगरी समाजवादी स्थायी कमिटी सदस्य हरि पराजुली, पोलिटब्यूरो सदस्य लक्ष्मण लम्साल र युवा संघका पूर्वअध्यक्ष नरेशकुमार शाही पनि भेलामा छन् ।

यो समूहले काठमाडौँको शान्तिनगरस्थित बानेश्वर क्याम्पसमा गुट भेला गरेको हो । पछिल्लो समय अध्यक्ष नेपालले एकलौटी गरेको भन्दै सम्मानित नेता खनाल र महासचिव भुसालले मोर्चा कसेका छन् ।

भ्रष्टाचार मुद्दासमेत खेपिरहेका अध्यक्ष नेपालको मनलाग्दी कार्यशैली र अहंकारी व्यवहारबाट आजित भएकाले भेला गर्नुपरेको नेताहरूको तर्क छ ।

नेपाल र खनालबीचको शक्ति संघर्षका कारण समाजवादी संकटमा परेको छ । झलनाथलाई साथ दिए पनि अहिलेसम्म मौन रहेका महासचिव भुसाल पनि अब खुलेका छन् ।

अध्यक्ष नेपालले माओवादी केन्द्रसँग एकता वार्ता तीव्र पारेसँगै यो समूह बिच्किएको हो । आफूहरूलाई थाहै नदिई समाजवादीलाई माओवादीको जिम्मा लगाउन लागिएको भन्दै उनीहरू रुष्ट छन् ।

यसअघि पार्टीमा देखिएको विवाद अहिले भ्रातृसंगठनमा समेत पुगिसकेको छ । युवासंघ नेपाल र अनेरास्ववियूमा समानान्तर अभ्यास नै चलिरहेको छ। नेकपा एमाले छाडेर चार वर्ष निष्क्रिय रहेका वामदेव गौतमलाई भित्र्याएपछि त झन् यो पार्टी फुटतिर उन्मुख भएको छ ।