काठमाडौं – नायक प्रवीण खतिवडा शीर्ष भूमिकामा रहेको फिल्म ‘शिवांश : च्याप्टर १’ कात्तिक २७ बाट प्रदर्शनमा आउने भएको छ । निर्माण पक्षले शनिबार एक पोस्टर सार्वजनिक गरी प्रदर्शन मितिबारे जानकारी दिएको हो ।

पोस्टरमा एक विशाल पहाडको फेदमा शिव र उनको वाहन प्रस्तुत गरिएको छ । जटाधारी शिवलाई पहाडतर्फ फर्काइएकाले अनुहार देखिएको छैन । साँढको निधारमा त्रिशुल अंकित छाप देख्न सकिन्छ ।

पोस्टरले फिल्म हिन्दू धर्मसँग सम्बन्धित रहेको संकेत गर्छ । तथापि निर्माण पक्षले फिल्मको कथाबारे केही जानकारी दिएको छैन ।

यो फिल्मको छायाङ्कन पोखरा आसपासको क्षेत्रमा भएको निर्माण पक्षले जनाएको छ । अहिले यसको प्रोस्ट प्रोडक्सनको काम भइरहेको बुझिएको छ ।

सन्तोषकुमार आत्रेयको डेब्यू निर्देशनमा यो फिल्म बनेको हो । फिल्ममा प्रवीणसहित तेज गिरी र रषा न्यौपाने शीर्ष भूमिकामा रहेको बताइएको छ ।

अञ्जान सिनेमा प्रोडक्सन हाउसको प्रस्तुति रहेको यस फिल्मको निर्माता अञ्जान केसी हुन् । उनी आफैँले यसको कथा लेखेका हुन् भने पटकथा बारत लिम्बूको हो ।