काठमाडौं – भारतको गुवाहटीमा असाम प्रदेशसँग जारी टी–२० सिरिजमा आज नेपाल ‘ए’ टिमले चौथो प्रतिस्पर्धा गर्दैछ।तीन खेल सम्पन्न भएको सिरिजमा नेपाल लगातार दुई खेलमा विजयी भएको छ।पहिलो खेलमा डक वर्थ लुइस (डीएल) पद्धतिका आधारमा १५ रनले पराजित भएको नेपाल दोस्रो खेलमा ९६ र तेस्रो खेलमा ९ रनले विजयी भएको छ।

चौथो खेल आइतबार साँझ ५ बजे सुरु हुँदैछ।यो प्रतिस्पर्धा नेपाल क्रिकेट संघ क्यानले आफ्नो युट्युब च्यानलमार्फत् प्रत्यक्ष प्रशारण गर्दै आएको छ ।

क्यानले घोषणा गरेको अनिलकुमार साह कप्तान रहेको नेपाल ‘ए’ टिमममा अलराउन्डर आदिल आलम, ब्याट्सम्यान सन्दीप जोरा लगायतका युवा तथा अनुभवी खेलाडी समावेश छन्।

नेपालले आसाममा पाँच टी–२० प्रतिस्पर्धा गर्दैछ। आसामसँगको पाँचौ अर्थात् अन्तिम भिडन्त सोमबार हुँदैछ।

नेपाल ‘ए’ टिम

नेपाल ‘ए’ टिममा कप्तान अनिलकुमार शाहसँगै अदिल आलम, पवन सर्राफ, सन्दीप जोरा, शुभ कंशाकार, ईशान पाण्डे, देव खनाल, विवेककुमार यादव, कमलसिंह ऐरी, बसिर अहमद, आकाश चन्द, सागर ढकाल, अर्जुन घर्तीमगर, तृतराज दास, युवराज खत्री र शेर मल्ल छन्।