काठमाडौं – गत भदौ २३ र २४ गते भएको जेन–जी आन्दोलनपछि घाइतेको उपचार र मृतकका परिवारलाई राहत दिलाउन सक्रिय सामाजिक अभियन्ता आशिका तामाङ फेरि चर्चामा आएकी छन्।

आन्दोलनका बेला रातदिन खटिएकी उनलाई समर्थकहरूले आशिका ‘दिदी’का रूपमा सम्बोधन गर्छन्।जेन–जीहरूको दबाब र माहोलकै बीच देश निर्वाचन प्रक्रियातर्फ उन्मुख हुँदै गर्दा दलहरूले सोमबार र मंगलबार निर्वाचन आयोगमा समानुपातिक उम्मेदवारको सूची बुझाएका छन्।

तर ती सूचीमा पुराना भनिएका नेपाली कांग्रेस र नेकपा एमालेदेखि नयाँ भनिएको राष्ट्रिय स्वतन्त्र पार्टीसम्ममा नेताका आफन्त, परिवारका सदस्य, व्यापारी र पुरानै अनुहार दोहोरिएको भन्दै आलोचना भइरहेको छ।

विशेषगरी ‘नयाँ पार्टी’ भनेर स्थापित रास्वपाको समानुपातिक सूचीमाथि तीव्र आलोचना भइरहेको सन्दर्भमा आशिका तामाङले मंगलबार सामाजिक सञ्जाल फेसबुकमार्फत दुई गम्भीर प्रश्न उठाएकी छन्।

उनले लेखेकी छन्, ‘सक्षमता भनेको डिग्रीमा मात्रै हुन्छ भन्ने ठूलो भ्रम रहेछ। धेरै डिग्री भएकाले मात्रै देश हाँक्न सक्ने भए डा. बाबुराम भट्टराईले उहिल्यै देश सिङ्गापुर र स्विजरल्यान्ड बनाइसक्नु पर्ने थियो।’

दोस्रो प्रश्न उनले रास्वपामाथि गरेकी छन् । उनले लेखेकी छन्, ‘७० वर्षको ससुरा बा पनि समानुपातिक आठ नम्बर कोटामा! भनेपछि नयाँ पार्टीमा पनि नातावाद हाबी छ ? के फरक भयो त नयाँ र पुरानो पार्टीमा ?’ उनले प्रश्न गरेकी छन्।

आशिकाले उठाएको यो प्रश्न सोमबार मात्रै रास्वपामा प्रवेश गरेका कुलमान घिसिङका ससुरा नाता पर्ने धर्मलाल तामाङ लक्षित हो। आदिवासी जनजाति क्लस्टरअन्तर्गत समानुपातिक सूचीको आठौं नम्बरमा रहेका धर्मलाल तामाङ कुलमानका भाइका ससुरा भएको बुझिएको छ।

उनी यसअघि एमाले छोडेर उज्यालो नेपाल पार्टीमा आएका थिए। सो पार्टीलाई कुलमान घिसिङले हालै रास्वपामा समाहित गरिसकेका छन्। यसअघि पनि आशिकाले सामाजिक सञ्जालमा लैंगिक विभेदबारे कडा टिप्पणी गर्दै लेखेकी थिइन्, ‘यो देशमा नारीले रगत बगाएर योगदान दिए पनि अन्त्यमा पुजिने भनेको पुरुष नै रहेछ। नेपाली समाजमा अझै गहिरो विभेद छ।’