काठमाडौं– बंगलादेशमा नयाँ नियुक्त गरिएका न्यायाधीशको सूचीमा अल्पसङ्ख्यक समुदायको प्रतिनिधित्व नभएको भन्दै मानव अधिकारवादी संस्थाले आलोचना गरेको छ । बंगलादेशमा अल्पसङ्ख्यक समुदायको प्रतिनिधित्व गर्दै आएको बंगलादेश हिन्दू, बौद्ध, इसाई एकता परिषदले नवनियुक्त न्यायाधीशको सूचमा अल्पसङ्ख्यक नपरेको जनाएको हो ।

हालै बंगलादेशको अदालतमा २५ जना न्यायाधीश नियुक्त गरिएको छ । यसरी नियुक्ती लिनेमा नौ जना न्याय अधिकारी छन्, नौ जना अधिवक्ता छन् भने सात जना कानुन अधिकारी रहेका छन् ।

स्थानीय सञ्चार माध्यमका अनुसार बंगलादेशका राष्ट्रपति मोहम्मद शाहबुद्दिनले प्रधान न्यायाधीश सइद रेफात अहमदको सल्लाहमा उनीहरुको नियुक्ती गरेका हुन् । यससँगै बंगलादेशमा न्यायाधीशको सङ्ख्या १ सय १३ पुगेको छ ।

गत महिना बंगलादेशको अवामी लिग पार्टीले मोहम्मद युनुसको नेतृत्वमा रहेको वर्तमान अन्तरिम सरकारले न्यायपालिकालाई ‘हतियारका रुपमा दुरुपयोग’ गरिरहेको भन्दै निन्दा गरेको थियो । लिगले अहिले मुलुकका न्यायाधीशहरु ‘युनुसको भीडबाट निर्देशित’ रहेको पनि आरोप लगाएको छ ।