काठमाडौं– सत्तारुढ नेपाली कांग्रेसको भ्रातृ संगठन नेपाल विद्यार्थी संघ (नेविसंघ) को असन्तुष्ट पक्ष प्रदर्शनमा उत्रिएको छ ।

संगठनको महाधिवेशन माग गर्दै असुन्तष्ट पक्षले सोमबार पार्टी केन्द्रीय कार्यालय सानेपा प्रदर्शनसहित घेराउ गरेको हो ।

०७९ सालको प्रतिनिधिसभाको चुनाव भएकको तीन महिनाभित्र महाधिवेशन गर्ने कार्यादेश पाएको तदर्थ समितिले पटकपटक म्याद थप्दा पनि अधिवेशन गर्न सकेको छैन । त्यहीकारण उनीहरूले दबाबका लागि कांग्रेस केन्द्रीय कार्यालय घेरेका हुन् ।

मातृ पार्टीले यसअघि ०८१ चैत मसान्तदेखि तदर्थ समितिको कार्यकाल स्वतः समाप्त हुने निर्णय गरिसकेको छ । त्यसकै आधारमा नेविसंघको तदर्थ समिति भंग हुनुपर्ने माग आन्दोलनरत विद्यार्थीहरूले गरिरहेका छन् ।

यस्तै कांग्रेसको अर्को भ्रातृ संगठन नेपाल तरुण दलको तदर्थ समिति पनि भंग हुनुपर्ने मागसहित सानेपामा केन्द्रीय सदस्यद्वय रोजन राई र अम्बिका बास्कोटाले आइतबारदेखि आमरण अनसन सुरु गरेका छन् ।

कांग्रेसको सोमबारदेखि सुरू हुन गइरहेको केन्द्रीय कार्यसमिति बैठकमा भ्रातृसंगठनबारे छलफल गर्ने एजेन्डा छ । उक्त बैठकअघि नै भ्रातृसंगठनहरूले मातृ पार्टीका नेतालाई दबाब दिन घेराउ र अनशनसहितका आन्दोलन थालेका हुन् ।

तस्बिहरू : नेपाल फोटो लाइब्रेरी