काठमाडौं – नायक दयाहाङ राई र प्रकाश सपुत शीर्ष भूमिकामा रहने फिल्म ‘मिरमिरे’को वर्कसप आइतबारबाट सुरु भएको छ ।

फिल्मका शीर्ष कलाकार दयाहाङ, प्रकाश र नायिका सिर्जना निङ्लेखु वर्कसपमा सहभागी छन् ।

छोटो समय वर्कसप गरेर निर्देशक यम शेर्पा यही शुक्रबारबाट छायाङ्कनमा निस्कने तयारीमा छन् ।

निर्देशक शेर्पा भन्छन्, ‘वर्कसपमा बस्न सबै कलाकारको समय मिल्यो । अब छायाङ्कन छिटो सक्न सहयोग पुग्नेछ ।’

यो फिल्मका लेखक पनि शेर्पा आफैँ हुन् । आधाभन्दा बढी छायाङ्कन काभ्रेमा हुने निर्देशक शेर्पा बताउँछन् ।

यमले दयाहाङ र नायिका सिर्जनासँग दोस्रो पटक सहकार्य गर्न लागेका हुन् । यमको डेब्यू फिल्ममा पनि यी दुई नायक–नायिका थिए ।

प्रकाशसँग भने यमले पहिलो पटक सहकार्य गर्न लागेका हुन् । यस फिल्मको निर्माता निमु शेर्पा, छोङ्बा लामा शेर्पा र आङछिरिङ शेर्पा हुन् ।

वर्कसपको थप तस्बिरहरु :