काठमाडौं – नेपाल प्रहरीले यही शुक्रबार भएको राजावादी आन्दोलनको क्रममा कोटेश्वरस्थित भाटभटेनी सुपरस्टोरमा लुटपाट गर्ने केहीलाई पक्राउ गरेको जनाएको छ ।

यही क्रममा भाटभटेनीबाट तीन दाना स्याउ र सुन्तला लिएर भाग्ने व्यक्ति पनि पक्राउ परेका छन् । सामाजिक सञ्जालमा भाइरल भिडियोका आधारमा प्रहरीले ती व्यक्तिलाई पक्राउ गरेको हो । उनको नाम र ठेगाना भने प्रहरीले खुलाएको छैन् । सार्वजनिक भिडियोमा ती व्यक्तिले तीन/चार दाना सुन्तला र स्याउ खल्तीमा राखेर भाग्दै गरेको देखिन्छ ।

यस्तै ब्ल्याक लेबल र ज्याक डेनियल रक्सी लुटेका धनुषाका आशिष तामाङ, बियर लुटेका सर्लाहीको प्रेमकुमार महतो, यार्चागुम्बा ब्राण्डको मदिरा लुटेका भारतका रविरञ्जन कुमार पक्राउ परेका छन् ।

उता हाफ पाइन्ट र ट्राउजर लुटेर भागेकी नुवाकोटकी सुशील कुमाल पनि पक्राउ परेकी छन् ।

त्यस्तै, ट्रे र क्यारेट लुटेर लगेकी सुनसरीकी एलिसा राई, क्यारेट लुटमा संलग्न कोटेश्वरकै बालकुमारी कार्की पनि समातिएकी छन् ।

फलफूल लुटमा संलग्न सिन्धुपाल्चोककी निर्मला कार्की पनि पक्राउ परेकी छन् । उता भाटभटेनीको भुइँतलास्थित स्टोरबाट लिपिस्टिक र गाजल लुटेर लैजाने कोटेश्वरकै चित्रमाया बस्नेत र सुस्मिता बराललाई पक्राउ गरिएको प्रहरीले जनाएको छ ।