काठमाडौं- राजावादीहरूले शुक्रबार गरेको आन्दोलन हिंसात्मक भएपछि केही नेता समातिएका छन् भने केही नजरबन्दमै परेका छन् ।

शुक्रबार दुईजनाको ज्यान जाने गरी भएको हिंसात्मक आन्दोलनपछि प्रहरीले धरपकड तीव्र बनाउँदा राजावादीहरूको भागाभाग भएको छ।

अहिलेसम्म राजावादी आन्दोलन समितिका संयोजक नवराज सुवेदी घरमै नजरबन्दमा परेका छन् । उनको निवासलाई प्रहरीले घेरेर राखेको छ।

सुवेदीलाई मोबाइल फोन र अन्य सञ्चारका साधनबाटसमेत बञ्चित गरिएपछि उनले आन्दोलन समितिको संयोजक नै अर्कोलाई तोकेका छन् ।

शुक्रबार काठमाडौंमा भएको प्रदर्शन हिंसात्मक भएपछि स्थगित भएको आन्दोलनलाई गति दिने गरी नयाँ संयोजकका रुपमा जगमान गुरुङलाई तोकिएको हो ।

शुक्रबार भिडलाई उक्साएर भागेका राजावादी आन्दोलनको जनकमाण्डर तोकिएका दुर्गा प्रसाईं अहिले लुकेर बसिरहेका छन् । शुक्रबार निषेधित क्षेत्र तोडेपछि गाडी खोसिएर भागेका उनले आफू काठमाडौंमै रहेको जिकिर गरेका छन् ।

भागेका उनै प्रसाईं तीनकुने घटनाको मुख्य योजनाकार रहेको निष्कर्ष सरकारले निकालेको छ । यस प्रकरणमा राप्रपा वरिष्ठ उपाध्यक्ष रवीन्द्र मिश्र र महामन्त्री धवलशमशेर जबरा अहिले प्रहरीको हिरासतमा छन् । उनीहरूलाई आइतबार म्याद थपिँदैछ । तर उनीहरूको मुद्दाबारे प्रहरीले एकिन गरिसकेको छैन ।

राजसंस्था पुनर्स्थापनाका लागि संयुक्त जनआन्दोलन समिति संयोजक सुवेदी घरमै नजरबन्दमा परेपछि उनले अब कार्यवाहक संयोजक संस्कृतिविद जगमान गुरुङलाई बनाएका हुन् ।

सुवेदीले अब आन्दोलन जगमान गुरुङ (नेपाल ऋषि) को नेतृत्वमा राजावादी आन्दोलन अघि बढ्ने बताएका छ्न । यसैबीच सुवेदीले आन्दोलनलाई निरन्तरता दिन सबै दल र संघ-संस्थासँग सहयोगको अपिल पनि गरेका छन् ।