काठमाडौं – नेपाल विद्युत प्राधिकरणका प्रबन्ध निर्देशक पदबाट गत सोमबार बर्खास्त कुलमान घिसिङको रिटमाथि आइतबार सुनुवाइ नहुने भएको छ।

सुनुवाइका लागि रिटको पेशी न्यायाधीश प्रकाशमान सिंह र शारङ्गा सुवेदीको इजलासमा तोकिए पनि ‘हेर्न नभ्याइने’मा राखिएको हो ।

यस रिटमा शुक्रबार प्राम्भिक सुनुवाइ गर्दै सर्वोच्चले कारण देखाऊ आदेश जारी गरेको थियो। न्यायाधीश अव्दुलअजिज मुसलमानको एकल इजलासले घिसिङलाई बर्खास्त गर्नुपर्ने कारण सरकारलाई सोधेको थियो।

तर उक्त इजलासले अन्तरिम आदेश नदिएपछि नवनियुक्त प्रबन्ध निर्देशक हितेन्द्रदेव शाक्यालई काम गर्ने बाटो खुलेको थियो ।

शुक्रबार सर्वोच्चले सरकारसँग लिखित जवाफ माग्दै अन्तरिम आदेश हुने वा नहुने विषयमा दुवै पक्षलाई आइतबार बोलाएर छलफल गर्ने भनेको थियो ।

कुलमानलाई गत सोमबारको मन्त्रिपरिषद् बैठकले प्राधिकरणबाट बर्खास्त गरेर हितेन्द्रदेवलाई नियुक्त गरेको थियो । त्यसविरुद्ध कुलमान सर्वोच्च गएका थिए ।

कुलमानले आफूलाई हटाउने सरकारको निर्णयविरुद्ध अन्तरिम आदेश माग गरेका थिए । तर सर्वोच्चले अन्तरिम आदेश दिन मानेन ।