काठमाडौं – युरोपेली च्याम्पियन्स लिगको पहिलो चरणको अन्तिम खेलमा बार्सिलोना र एटलान्टाको २-२ गोलको बराबरी भएको छ।

गोलरहित बराबरीमा पहिलो हाफ सकिएको सो खेलमा दोस्रो हाफ सुरु हुने बित्तिकै राफिन्हाको क्रसमा गोल गर्दै लामिन यमालले बार्सिलोनालाई अग्रता दिलाएका थिए। ६७ औँ मिनेटमा एडरसनले एटलान्टाका लागि बराबरी गोल फर्काएका थिए।

खेलको ७२ औँ मिनेटमा रोनाल्ड अराउजोले बार्सिलोनालाई दोस्रो पटक अग्रता दिलाए। मारियो पासालिकले गोल गर्दै एटलान्टालाई फेरि बराबरीमा फर्काएका हुन्। यो बराबरीसँगै दुवै टिमले अंक बाँडेका छन्।

यो खेलसँगै बार्सिलोना दोस्रो स्थानमा रहँदै सिधै दोस्रो चरणमा प्रवेश गरेको छ भने एटलान्टा बराबरीपछि नवौँ स्थानमा झर्दै प्ले अफ खेल्ने भएको छ। प्ले अफमा एटलान्टाले स्पोर्टिङ या ब्रुग मध्य एकसँग खेल्ने छ।