काठमाडौं– आसन्न नेपाल चिकित्सक संघको केन्द्रीय कार्यकारिणी समितिको उपाध्यक्ष तथा बागमती प्रदेश संयोजकमा उम्मेदवारी दिएका डा.अरुण शाहीको उम्मेदवारी खारेजीविरुद्ध परेको रिटमा उच्च अदालत पाटनले अन्तरिम आदेश दिएको छ । 

रिट निवेदक डा. शाहीको पक्षमा अन्तरिम आदेश जारी भएको हो । न्यायाधीश कृपासुर कार्कीको एकज इजलासले अन्तरिम आदेश दिएको हो । 

संघ निर्वाचन समितिले पुस ५ र पुस ९ गतेको  गरेको निर्णय कार्यान्वयन नगर्न अन्तरिम आदेश जारी गरेको हो । डा. शाहीले नेपाल चिकित्सक संघको विधान र नियमावली विपरीत समितिले आफ्नो  उम्मेदवारी खारेज गरेको भन्दै रोक्न अन्तरिम आदेश मागेका हुन् । 

अदालतले विपक्षी संघ र निर्वाचन समितिलाई १५ दिनभित्र लिखित जवाफ पेश गर्न पनि भनेको छ । डा. शाहीका तर्फबाट अधिवक्ताद्वय किशोरकुमार विष्ट र अनुपम विष्ट, वरिष्ठ अधिवक्ताहरू हरि उप्रेती, रमेश बडाल, टीकाराम भट्टराई र भोजराज आचार्यले बहस गरेका थिए ।

प्रक्रिया पूरा गरेर आफूलाई निर्वाचन प्रक्रियामा सहभागी हुनबाट वञ्चित गरिएको भन्दै डा. शाहीले सुरुमा निर्वाचन समिति समक्ष पुनर्विचारका लागि निवेदन दिएका थिए । 

त्यसको सुनुवाइ नभएको भन्दै उहाँले जिल्ला प्रशासन कार्यालयमा पनि निवेदन दिएका थिए । जिल्ला प्रशासन कार्यालयले रितपूर्वक मनोनयन दर्ता भएको ठहर गर्दै निर्वाचन समितिलाई आफूखुसी नियम बनाउने अधिकार नभएको स्पष्ट पारेको थियो ।

तर समितिले उनको दर्ता खारेजी कायम राख्दै उम्मेदवारहरूको अन्तिम नामावली प्रकाशन गरेको थियो । संघको निर्वाचन आगामी माघमा हुँदैछ । उपत्यका बाहिर माघ २ र ३ गते मतदान हुनेछ । काठमाडौं उपत्यकामा माघ १५–१७ गते मतदान गर्ने कार्य तालिका रहेको छ ।