ढाका – वेस्ट इन्डिजले बङ्गलादेशविरुद्धको दोस्रो टी–२० खेलमा १४ रनको जित निकाल्दै तीन खेलको सिरिज एक खेल अगावै आफ्नो नाममा पारेको छ।

ढाकामा बुधबार सम्पन्न खेलमा पाहुना टोली वेस्ट इन्डिजले पहिलो ब्याटिङ गर्दै २० ओभरमा ९ विकेट गुमाएर १४९ रनको योगफल तयार गरेको थियो। वेस्ट इन्डिजका लागि शाय होपले ३६ बलमा ५५ रन र एलेक अथानाजले ३३ बलमा ५२ रनको योगदान दिए।

बलिङतर्फ बङ्गलादेशका मुस्ताफिजुर रहमानले ३ विकेट लिए भने रिशाद होसैनले २ विकेट र नासुम अहमदले २ विकेट हात पारे।

लक्ष्य पछ्याउने क्रममा घरेलु टोली बङ्गलादेश निर्धारित २० ओभरमा ८ विकेट गुमाएर १३५ रनमा सीमित रह्यो। बङ्गलादेशका तानजिद हसनले ४८ बलमा ६१ रन बनाए पनि अन्य ब्याट्सम्यानले उल्लेख्य प्रदर्शन गर्न सकेनन्।

वेस्ट इन्डिजका बलरहरू मध्ये अकेल होसिन र रोमारियो शेफर्डले ३–३ विकेट लिए भने जेसन होल्डरले २ विकेट हात पारे।

यसअघि सिरिजको पहिलो खेलमा पनि वेस्ट इन्डिज १६ रनले विजयी भएको थियो। लगातार दुई जितसँगै वेस्ट इन्डिजले सिरिज २–० ले आफ्नो पक्षमा पक्का गरेको छ। अब बाँकी तेस्रो खेल औपचारिकता मात्र बनेको छ।