काठमाडौं– पाकिस्तानको सुरक्षाबलले बलोचिस्तानमा दुई जनालाई नियन्त्रणमा लिएको छ । सुरक्षाकर्मीले बलोचिस्तानको कोलवाह र खरान जिल्लाबाट दुई जनालाई नियन्त्रणमा लिएको हो ।

द बलोचिस्तान पोस्टका अनुसार सुरक्षाकर्मीले कोलवाह जिल्लाको अशल क्षेत्रबाट रियाजी नाम गरेका व्यक्तिलाई नियन्त्रणमा लिएको हो । उनलाई फ्रन्टियर कोरका सैनिकले नियन्त्रणमा लिएको जनाइएको छ । उनको अवस्था अझै अज्ञात छ ।

त्यसैगरी, खरानबाट प्रतिआतंकवाद विभाग र गुप्तचर निकायले लेभी नामक अर्धसैनिक बलका एक सदस्यलाई पनि नियन्त्रणमा लिएको छ । हाजी मोहम्मद हुसैन कुबदानीका छोरा बशिर अहमद कुबदानीका रुपमा उनको पहिचान गरिएको छ ।

उनको अवस्था पनि अज्ञात छ । घटनापछि बशिर अहमदका परिवारले उनलाई नियन्त्रणमा लिइनुको कारणबारे आफूहरुलाई केही जानकारी नभएको जनाएका छन् ।

उनलाई जबरजस्ती बेपत्ता पारिएको हुनसक्ने आशङ्का गरिएको छ । यसबारे अधिकारीहरुले कुनै औपचारिक जानकारी दिएका छैनन् ।