काठमाडौं- वेस्ट इन्डिजविरुद्धको युनिटी कप टी २० आई सिरिजअन्तर्गत दोस्रो खेलमा नेपालले पहिला ब्याटिङ गर्ने भएको छ ।

यूएईको शारजाह क्रिकेट रंगशालामा कप्तान रोहित पौडेलले टस जितेर पहिला ब्याटिङ गर्ने निर्णय गरेका हुन् ।

यस खेलमा मोहम्मद आदिल आलमले नेपालका लागि पुनरागमन गरेका छन् ।

नेपाली टिममा स्पिनर सन्दीप लामिछाने भने अटाएका छैनन् । यसअघि पहिलो खेलमा पनि सन्दीप टिममा परेका थिएनन् ।

नेपाली टिममा रोहित कुमार पौडेल (कप्तान), दीपेन्द्र सिंह ऐरी, कुशल भुर्तेल, कुशल मल्ल, सन्दीप जोरा, आसिफ सेख, करण केसी, आदिल आलम, ललित नारायण राजवंशी, गुलशन झा र सोमपाल कामी छन् ।

शनिबार भएको पहिलो खेलमा नेपालले वेष्ट इन्डिजविरुद्ध ऐतिहासिक जित निकालेको थियो । नेपालले आईसीसीको टेस्ट टोलीमाथि जित निकालेको पहिलो पटक हो ।

नेपाली टोली यो खेलमा जित निकाल्दै तीन खेलको सिरिज एक खेल अगावै आफ्नो पक्षमा पार्ने लक्ष्यका साथ मैदान उत्रिएको छ ।