काठमाडौं– पछिल्लो एक सातामा देशभर २ सय ६ जनामा डेंगुको संक्रमण पुष्टि भएको छ । इपिडिमियोलोजी तथा रोग नियन्त्रण महाशाखा (इडिसीडि) को तथ्यांक अनुसार गत २४ घण्टामा २३ जना नयाँ संक्रमित थपिएका छन् । 

योसँगै नेपालमा डेंगु संक्रमितको संख्या ३ हजार ५ सय ८६ पुगेको छ । सबैभन्दा धेरै गण्डकी प्रदेशमा ९ सय ९८ जनामा संक्रमण देखिएको छ भने बागमतीमा ७ सय ४५, लुम्बिनीमा ६ सय २१, कोषीमा ६ सय ७, सुदूरपश्चिममा ४ सय २१, कर्णालीमा १ सय २६ र मधेश प्रदेशमा ७१ जना संक्रमित रहेका छन् । 

अझै २ महिना डेंगुको जोखिम रहेकाले लामखुट्टेको टोकाइबाट बच्नका लागि आवश्यक सतर्कताहरू अपनाउन चिकित्सकहरू सुझाउँछन् । डेंगु नियन्त्रणका लागि स्वास्थ्य मन्त्रालयले लार्भा खोज र नष्ट गर अभियान सञ्चालन गरेको छ ।