काठमाडौं – विगतका तीन–चार वर्ष यता नीताले सार्वजनिकरुपमै फिल्म निर्देशनमा हात हाल्ने इच्छा व्यक्त गर्दै आएकी थिइन् ।

गत वर्ष प्रदर्शनमा आएको फिल्म ‘ह्रस्व दीर्घ’ पनि उनको निर्देशनमा बन्ने चर्चा थियो । फिल्मको बजेट ठूलो हुने देखिएपछि उनी उक्त फिल्मको निर्देशनबाट पछि हटिन् । उक्त फिल्मबाट नीताले निर्माणमा भने हात हालिन् । नीताकै ब्यानर ‘नीता फिल्मस्’ को ब्यानरमा उक्त फिल्मको उनी निर्मात्री र नायिका हुन् ।

अब भने नीताको निर्देशक बन्ने सपना पूरा हुने देखिएको छ । ‘नीता फिल्मस्’ बाटै बन्ने फिल्म ‘सुख-दुःख’ निर्देशन गर्ने उनले सामाजिक सञ्जालबाट जानकारी दिएकी हुन् ।

अर्थात्, उक्त फिल्मबाट नीताले निर्देशनमा डेब्यू गर्ने भएकी हुन् । उनको फिल्म ०८३ सालको दशैँमा प्रदर्शनमा आउने पोस्टरमा उल्लेख छ ।