काठमाडौं– जापानले यस वर्षको सैन्य अभ्यासका क्रममा हालै विकास गरेको ‘टाइप ८८’ जमिनबाट समुद्रमा मार हान्ने क्षेप्यास्त्रको परीक्षण गर्ने भएको छ । जापानले यसै वर्षको जुन १९ देखि ३० सम्म होक्काइदो टापुको दक्षिणी तटीय क्षेत्रमा अभ्यास गर्न लागेको हो ।

उक्त अभ्यासका क्रममा जापानी प्रतिरक्षा बलको युद्धपोत प्रतिरोधी प्रणालीको प्रशिक्षण गरिने जापानी सञ्चार माध्यमले जनाएका छन् । जापानीको आशायी सिम्बुन अखबारले जनाएअनुसार जापानले आफ्नो भूमिबाट पहिलो पटक यस प्रकारको क्षेप्यास्त्र परीक्षण गर्न लागेको हो ।

यसअघि अमेरिका र अन्य विदेशी भूमिमा यस क्षेप्यास्त्रको परीक्षण भइसकेको जनाइएको छ । यस क्षेप्यास्त्रको मारक दूरी ६२ माइल रहेको जनाइएको छ ।

पूर्वी एशियामा चिनियाँ प्रभाव विस्तार भइरहेको अवस्थामा जापानले नयाँ क्षेप्यास्त्र परीक्षण गर्न लागेको हो ।